Hemen da berriro Errigora egitasmoa. Martxoaren 13ra bitartean Errigoraren “Nafar hegoaldeko uzta euskarari puzka” kanpainan parte hartzeko aukera duzue, eta saskiak Ikastolan jasotzeko aukera jarri dugu zuen eskura. Egin eskaerak webgunean!

Eusko Jaurlaritzak "Internet familian: erabilera segururako jarraibideak. Gurasoentzat eta beste pertsona heldu batzuentzat." gida-sorta argitaratu du, adinaren arabera banaturik. Familia guztien eskura jarri nahi ditugu gida hauek, Interneten arriskuak ezagutu eta jarraibideak jasotzeko.

Ikastolen VII. Batzarra ospatuko da ekainean, eta bertan zehaztuko dira Euskal Herriko Ikastolek datozen 8-10 urteetako erronkei aurre egiteko estrategiak. Garai berrietara egokitzeko hausnarketari ekin diogu Ikastolok, eta funtsezkoa iruditzen zaigu guraso eta langileok ere hausnarketa honetan parte hartzea.

Ikastolako 3 sukaldeetan hainbat jubilazio izango ditugu datozen hilabeteetan eta postu horiek estaltzeko sukaldari berriak beharko ditugu. Horietako lehena aukeratzeko deialdia duzue hemen. Zabaldu mezua Ikastolako guraso eta lagunen artean!

Aurten DBH 4 egiten ari diren ikasleen familientzat orientazio akademikoko saio bat antolatu dugu, datorren martxoaren 13rako. Hurrengo ikasketei begirako informazioa jasoko duzue orientatzaile akademikoaren eskutik, ikasleek hartu beharreko erabakietan bidelagun izan zaitezten.

LH 2ko ikasleok Lanbideak lantzen ari gara azken asteotan, eta ba al da lanbide desberdinak ezagutzeko modu hoberik gure gurasoek beren lanbideen berri ematea baino? Zenbat lanbide ezberdin ezagutzen ari garen, eta zer nolako ilusioa egiten digun gurasoak gure geletara etorzeak!!

Euskarazko erreferenteak ikasleengana ekartzeko ahalegina egiten dugu urtero, eta gaur, Nogen musika taldeko kideak izan ditugu bisitan, LH 2 eta LH 4ko ikasleekin. Giro izugarri polita sortu da denon artean, eta haiek ere ilusioz etorri dira Ategorrieta ezagutzera, Zurriolako ikasle ohiak baitaude kideen artean.

Gurasoen Euskara Batzordea hizkuntzen erabileraren neurketak egiten aritu da ikasturte honetan, ikastola barruan gurasoon artean zenbat euskara erabiltzen dugun jakiteko. Gaztelaniaren presentzia handia da, eta berriz ere gogorarazi nahi dugu zein garrantzitsua den gurasook egunerokoan euskararen erabileran ematen dugun eredua.

Baionako Bernat Etxepare Lizeoko ikasleek bideo bat sortu dute beren aldarria guztiok zabal dezagun. Korrikaren egunean Euskal Herriko Ikastolok lekukoa hartzen dugunean beren aldarria zabaltzeko eskatzen digute, eta halaxe egingo dugu, hizkuntz eskubideen urraketari herri bezala erantzun bat emateko! Koletibo honen inguruko dokumental ineteresgarri bat ere egin dute, beren arazoa eta aldarria gertuagotik ezagut ditzagun.