Itzultzaile berriak

Apirilaren 14an, itzulpengintzari buruzko saio bat izan zuten Literatura Unibertsala ikasgaiko ikasleek (Batxilergoko lehenengo mailan ematen da ikasgaia). 

Horretarako, Donostia 2016k, Etxepare Institutuak eta EIZIE Euskal Itzultzaile, Zuzentzaile eta Interpreteen Elkarteak koordinatzen ari diren Itzultzaile Berriak programako lau gonbidatuak etorri ziren ikastolara, ikasleekin batera gaia jorratzera. 

Hortaz, Europako hainbat herrialdetatik (askotan ezezagunak) etorritako gonbidatuak izan genituen: Laura Liubinavičiūte, Liuaniatik; Mariya Petrova Pachkova, Bulgariatik; Barbara Pregelj, Esloveniatik, eta Katarzyna Sosnowska, Poloniatik. Haiekin, bidaia literarioa egin genuen Lituaniako, Bulgariako, Esloveniako eta Poloniako letretan zehar: herrialde horietako literatura ezagutu genuen poesia, musika, Bigarren Mundu Gerrako testigantza eta haur literaturaren bitartez. 

Lau gonbidatuak eskarmentu handiko itzultzaileak dira beraien herrietan, eta Euskal Herrira etorri dira, Donostia 2016ren programaren barruan, euskara ikasi eta gure literatura ezagutzera; gero, haietako bakoitzak euskal literatur lan bat itzuliko du bere hizkuntzara. Horrela, itzulpenaren bidez, euskara Europako beste hizkuntza batzuekin harremanetan jarriko da, eta, harreman kultural horien bidez, bere ondarea aberastu egingo du.

Informazio gehiagorako: http://www.eizie.eus/Jarduerak/itzultzaile_berriak/Solasaldia